De fraach oan de amtners en de wethâlders wie ek wol hiel breed. Fan de bou fan 100.000 nije wenningen, natuer en lânskip, ûntwikkeling fan stedske kwaliteiten, klimaat, wurkjen, wenjen, rekreaasje, oant de takomst fan ús mobiliteit en folle net genôch. Wat betsjut dit allegear foar de nije Omjouwingsfyzjes fan de Provinsje en de gemeenten? It is gewoanwei te folle en te yngripend om foar 12 maart even op papier te setten, sa't frege is.
Alle remmen
los
Yn plak fan in debat,
liket it no in spultsje fan wethâlders dy't tsjin inoar op biede en inoar oerfalle
mei har plannen. De gemeente Ljouwert wol boppe-op syn besteande plannen noch
wol 10.000 wenningen ekstra bouwe, 20.000 yn totaal. Wethâlders yn Waadhoeke en
Noardeast-Fryslân jouwe oan dat se dêrfan skrokken binne, want sokke grouwélige
plannen sille ek effekten op de buorgemeenten hawwe. Yn totaal giet it yn
Fryslân mooglik om tsientûzenen ekstra wenningen. Dêr wêr't de gemeenten en
provinsje jierrenlang op basis fan realisme en ferwachtingen wurke hawwe, geane
op basis fan ien Twadde Keamer-moasje ynienen alle remmen los. Besteand belied
op it mêd fan wentebou, romtlike oardering en lânskipsbehâld kin aanst yn de
kliko.
Demokrasy
bûtenspul
De FNP hat grutte soarch oer hoe't dit no allegearre ferrint. Gemeenterieden en
Provinsjale Steaten krije inkeld ynformaasje, of meie der, nei't it oanbod al
opstjoerd is, nei de tiid nochris oer prate. Oer it Noarden, net foar of fan it
Noarden. Dêrmei wurde alle folksfertsjintwurdigjende organen yn Fryslân bûten
spul set, om nei de kabinetsformaasje mei in útmakke saak konfrontearre te
wurden.
Bouwe nei aard, skaal en karakter, autonome groei, en in snellere spoarferbining foar Fryslân, dat is wat de FNP wol. En dêrfoar is in demokratysk debat nedich yn ús mienskip, yn ús gemeenterieden en yn de Steaten. Saken dy't sa grut binne en sa'n grutte ynfloed hawwe op de takomst fan ús provinsje kinne net op basis fan in moasje op in moandeimiddei yn desimber fan boppe oplein wurde. Dyjinge dy't dat debat yn ús rieden en Steaten net fiere wol, nimt syn of har eigen fertsjintwurdigjende en kontrolearjende taak net serieus.
Corrie Bergstra, fraksjefoarsitter FNP Súdwest-Fryslân
Ate Eijer, fraksjefoarsitter FNP It Hearrenfean
Harm de Jong, fraksjefoarsitter FNP Opsterlân
Sijbe Knol, fraksjefoarsitter FNP Provinsje Steaten
Bert Koonstra, fraksjefoarsitter FNP Noardeast-Fryslân
Sake van der Meer, fraksjefoarsitter FNP Achtkarspelen
Durk Oosterhof, fraksjefoarsitter FNP Smellingerlân
Ferry van der Ploeg, fraksjefoarsitter FNP Dantumadiel
Jan Willem Tuininga, fraksjefoarsitter FNP Ljouwert
Jan Volbeda, fraksjefoarsitter FNP De Fryske Marren
Bert Vollema, fraksjefoarsitter FNP Waadhoeke
Frysk 
Nederlands
English
