De FNP komt woansdei mei in moasje yn de Steaten om de trochgeande ferbining fan Harns nei Hamburg te ûndersykjen. Dit omdat Grinslân no al dwaande is mei in ûndersyk foar in flottere spoarferbining fan Grins mei it Noard-Dútske efterlân. It liket de FNP foar de ynternasjonale berikberens fan ús gewesten logysk dat in trochgeande treinferbining mei dêrby de oriëntaasje op Noard-Dútslân en de oare Fryslannen, mei Fryslân derby ûndersocht wurdt. De moasje past yn it program fan de FNP, dat de berikberens fan Fryslân mei it iepenbier ferfier wêr mooglik ferbetterje wol.
It giet neffens FNP wurdfierder Sybren Posthumus net om djoere ynvestearringen yn nij spoar, mar om in bettere tsjinstregeling en benutting fan it besteande spoar mei lytse oanpassingen. Sa sille der op dit stuit al mear treinen ride op de ferbining fan Grins nei Leer. Lykwols troch de hiele spoarline fan Harns-Haven oant Hamburg as ien ferbining te besjen, kin it mooglik yn de takomst ta op in sneltrein dy't net út Grins of Ljouwert wei werom rydt, mar troch giet. De reistiid fan Harns nei Hamburg, mei de trein no 7 oeren, soe dêrtroch ek foars nei ûnderen kinne, sa is de FNP fan betinken.
Frysk 
Nederlands
English
