De FNP wol dat der in algemien ferbod komt op jacht én konsumpsje fan de beskerme greidfûgels. It giet dêrby benammen om skriezen, mar ek om oare greidfûgels lykas de ljip, tsjirk, strânljip en wylp.
Neffens FNP-wurdfierder Wopke Veenstra "raast it oan ‘e protters" dat der yn Frankryk mooglik wer greidfûgels delsketten wurde. "Alle ynspannings dy’t de leafst 3000 frijwilligers fan it BFVW yn Fryslân dogge en de € 9 miljoen ynset fan de provinsje lykje op dizze manier ta weismiten keard. De oantallen skriezen binne sûnt 1960 mei 68% omleech gongen, it wurdt tiid om it tij te kearen."
De FNP hat fierder mei súkses oandacht frege foar gearwurking op it mêd fan duorsume enerzjy. De EFA sil oer de lânsgrinzen hinne besjen hoe’t duorsume enerzjy syn plak krije kin. Dat wol sizze, komme mei alternativen foar enerzjyfoarmen dy’t lânskip, natoer of miljeu slim skeine. Moasjes dy’t de FNP stipe hat gean oer mear demokrasy yn de EU en oer it behâld fan moaie lânskippen.
FNP’er Olrik Bouma is opnij foar 3 jier keazen yn it EFA-bestjoer. De EFA (European Free Alliance) is in partij mei 11 sitten yn it Europeesk Parlemint. Der binne hast 50 regionale partijen út hiel Europa by oansletten. De FNP is sûnt de oprjochting lid.
Frysk 
Nederlands
English
