Woansdei 3 febrewaris 2016 wiene 10 leden fan de Steatefraksje en de riedsfraksje fan Dongeradiel fan de FNP op wurkbesite yn âldereintehús Spiker yn Ternaard.

De FNP-ers lieten har troch regiomanager Nely van der Sluis fan de Kwadrantgroep byprate oer de feroaringen sûnt in foarige wurkbesite. It gong oer de takomstplannen foar de âldereinsoarch. De folksfertsjintwurdigers lieten merke dat hja tige ynteressearre binne yn de ûntwikkelingen yn de âldereinsoarch yn it algemien, mar ek wat dit foar in regio lykas Ternaard en omkriten betsjut. Ek de Werkgroep Ouderenzorg Ternaard wie fertsjintwurdige by de wurkbesite.

It oerlis wie in ferfolch op de eardere wurkbesite fan de FNP oan Spiker yn novimber 2014 doe't de lokaasje faai stie en de âldereinsoarch yn Ternaard ferdwine soe. Underwilens is der in soad feroare.

Ofrûne simmer hat Pasana Ouderenzorg in trochstart makke ûnder de flagge fan de KwadrantGroep. Dizze organisaasje fielt him as ien fan de grutste soarchferlieners yn de provinsje Fryslân ferantwurdlik foar it behâld fan âldereinsoarch tichtby de minsken, dus ek op it plattelân en op de eilannen.

Op dit stuit is de KwadrantGroep dan ek yn petear mei ûnder oaren de gemeente en de wenningstifting om meiinoar in takomstbestendige foarm fan âldereinsoarch foar de regio te ûntwikkeljen.

In wichtich ûnderdiel fan it takomstplan is it datearre gebou dêr't Spiker yn sit. Sa lang as der oan it plan wurke wurdt, bliuwe yn Spiker 45 plakken beskikber foar bewenners en binne nije bewenners fan herten wolkom.