Trije
miljard liket hiel wat mar yn 2007, doe't de sweeftrein yn de loft hong, hie ús
regear dêr 2.8 miljard foar oer. Elk dy't wat wit fan ekonomy en grutte ynfra
projekten op dit stuit wit dat de ynflaasje it fûnemint ûnder elke lange termyn
begrutting wei slacht, wurksumheden oan de ôfslútdyk kostje bygelyks op dit
stuit minimaal 400 miljoen euro mear as begrutte, en dat bin mar wurksumheden,
lit stean in hiel nij trajekt.
Realisaasje fan de Lelyline yn 2038?
It leit ek net yn de line der ferwachting dat de grûnstoffen goedkeaper wurde
sille. Jild út de regio om by de laapjen is der net, dêr hat De Haach de lêste
jierren wol foar soarge. Grinslân is foar miljarden leechsûge mei alle mooglike
gefolgen en ek yn Fryslân sitte de gemeenten der net waarm by. Tal fan
oerheidstaken binne mei te min jild oer it stek smiten, in werferdieling fan it
gemeentefûns resultearre yn strukturele tekoarten foar de measte
plattelânsgemeenten en de provinsjale begrutting is foar de takomst werom
brocht fan 400 nei 250 miljoen. Nee der is hjir de kommende jierren net in
koartsje foar sokke grutte projekten te heljen. Europa soe ek meibetelje moatte
oan de line, dy betellet lykwols allinnich foar ynternasjonale treinferbiningen
en de Dútsers sjogge mear heil yn de line Amsterdam nei Münster. As wy it goed
besjogge is de hiele Lelylinelobby as in goedkeap stikje kaugom, it liket earst
hiel wat mar nei twa kear kôgjen smakket it net mear en is de rek der út.
Krityske noaten
Oer de winsklikheid hat de FNP earder partijbreed krityske noaten kreake.
Dat is net feroare. Yn in tiid dat yn in grut part fan ús provinsje de eigen
mobiliteit ûnder druk stiet, bushalten ferdwine, linen strekt wurde en brêgen
net ûnderholden wurde kinne soe in knappe lobby fan de deputearre sûnder
Lelyline- eachkleppen ek wat wurdich wêze. Wat jo fersmite komt net gau werom.
Noch mear ekonomyske en demografyske konsintraasje (45.000 wenningen) sil oare
parten fan de provinsje leechsûgje en it antlit fan Fryslân ûnwerstelber ferminke.
Gelokkich is it noch lang safier net. Mear en grutter is net altyd in antwurd,
dat kinne wy leare fan de Rânestêd. It is heech tiid om de ynwenner te
rieplachtsjen. Wat wol dy? En fertsjinnet Fryslân net in folle breder debat oer
har takomst, skaaimerken en kwaliteit lykas romte en lânskip? Folle breder as
it utopyske tinken fan de VNO-NCW's fan dizze wrâld dy't fine dat alles makber
is en yn tsjinst stean moat fan ekonomyske maksimalisaasje? Dizze diskusje is
al te lang útsteld. Gelokkich komme der meikoarten twa natuerlike mominten oan.
De earste yn maart fan 2022 en it jier derop noch ien. It is dan oan de
ynwenners. Wêr gean wy hinne mei Fryslân? En wat dy reservearre trije
miljard oanbelanget, ek dêr ha wy wol in idee foar: Jou de minsken yn Grinslân
in miljard ekstra kompensaasje foar de ierdbevingsskea. Itselde jild foar de
minsken mei fundearingskea yn Fryslân. En ynvestearje de tredde miljard foar in
part yn de bernehertôfdieling fan it UMCG dy't mei sluting bedrige wurdt.
Ut namme fan de FNP,
Bert Vollema (FNP Waadhoeke)
Aant Jelle Soepboer (FNP Noardeast-Fryslân)
Yde van Kammen (FNP Achtkarspelen)
Freddy de Haan (FNP Tytsjerksteradiel)
Durk Oosterhof (FNP Smellingerlân)
Harm De Jong (FNP Opsterlân)
Ate Eijer (FNP It Hearrenfean)
Gerda de Vries (FNP De Fryske Marren)
Tsjerk Bouwhuis (FNP Súdwest Fryslân)
Ferry van der Ploeg (FNP Dantumadiel)
Jan-Willem Tuininga (FNP Ljouwert)
Frysk 
Nederlands
English
